GOVERNMENT MIDDLE SCHOOL KAN KAL LAI KHA

Pi Rualchhingi hi thil rim hriat theih lamah chuan pakhatna a nih loh pawhin a sang pawl chu a ni hrim hrim ang. Class a rawn lut tur hi Serthlum kan loh ruk leh ruk loh a hre thei a ni. Pu Chawma kha Discipline in charge a ni thin bawk a, kan hlau thei fu mai. Vawikhat pawh, a period. Hindi kha kan thiam lova, bangrelah a period chhung zawng min dintir a, hautak ve tak mai ani.

1987 khan Pawl 5 kan zir a, sikul kan luh hnu reilote-ah siamchawp silai, U.T kan tih mai khan tuna Sericulture Firm hnuaia kan huanah Vazun ka kap e ka ti a, silai zen kha a mawng lam atangin alo phuhchhuak zawk mai a. Ka mit takah lehnghal. Ka meng thei lova, ka nuaten inlamah min kaihaw ta a. Thla 2 tlawng mai chu In lam leh Damdawi in lamah ka inenkawl a. Sikul ka kal leh theih meuh chuan First term atana kan course tur chu an lo zo der tawh mai hi a nia. Kan zirlai te chu a theih ang angin ka zir a, ka pa hian English min lehlin sak a. Harsa takin Damkawr tak chungin ka Exam zo ve mai bawk. Result a lo chhuak a, pakhatna ka ni ta hlauh mai a. Ka lawm ngei mai. Heta tang hian Govt. M/S, Zemabawk a ka kalchhung zawng chu class-ah pakhatna ka ni tluan chhuak ta parh nghe nghe a ni.

Kan harsa a, kum thum chhungin Uniform kekawr 1, Kawr 2, Mawza 2 leh Pheikhawk 1 ka tluan pui thak a ni.

Tlai sikul ban veleh Muthi lui kawngah ka tlan thla a, Theipui ka lo thin a, chu chu ka nauten Dut no 1 cheng 1 in an zuar a; Mauhak-ah Rawtuai ka khawrh fova, Zokhawsang ram lamah Sunhlu leh Zawngtah te ka lova, chu chuan ka lehkha zirna tura thil pawimawh te ka lei thin. Special Scholarship Rs. 120/- kumkhat atana kan lak thin kha ka hlawkpui hle. Sikul Admission tih nan kan hman bakah mi zirlaibu hlui lei nan kan hmang thin.

Tawngthu chhe lo, kan unau kan rual ve a, mi 5 in sikul kan lut tan kha a nia, ka nu leh pa lah chu Inhlawhchawp leh lo neia khawsa ve mai kha an ni a, kan hautak hle a ni. Zan dar 8 vel thleng hian ka leng a, a chhan chu ka nauten lehkha zir ve an duh a, kan inluah, leiin, thla khata Rs. 50/- manah khan lehkha zirna dawhkan kan nei lova, Thingrem pakhatah Diesel Bati siamchawp hmanga zir kan nih avangin dar 8 hnulamah ka zir a, dar 12 te ka thleng tlangpui a, zing lamah dar 4 velah ka thova, tlem ka zir hnuah tuna Pu Duata te awmna, kan in atang hian Biak in lui emaw Thingkhim lui emaw (tuna KVI kawrah) hian Tui kan zuk chawi thin.

English hi Pi Ramin min zirtir a, Pawl 7-ah Pu Rochuhthangan min zirtir a, tun thlenga ka hlawkpuina chu English Word harsa kha min bye-heart tir a, chu chu Class-ah min zawt leh thin a, thiam a awl duh hle. Pu Lalchungchangan Mathematics leh Science kha min zirtir a, Geometry portion kha Headmaster, Pu Liantusangan min zirtir thung a, ka man hlein ka inhria. Pi Rualchhingin History a la a, tun thleng hian ‘Bahmani lalram’ hian ka lung min len a, College-ah History Honour ka lak theih phah hnuah tuna IGNOU hnuaiah M.A zirleh min chaktirtu pawimawh tak a ni. Pu Roliana khan Geography min zirtir a, ram hrang hrang awmna hi ka hriat phahin a civics portion phei kha chu ka tangkaipui viau a ni mai thei, M.A-ah Public Administration ka zir phah nawlh mai. Pu Chawma khan Hindi kha a la a, Phung hawrawp ngaisang reng reng ngailo, keini ang te pawh a chhiar chauh na na na kha chu kan thiam, kan hrethiam lo mai pawh a!

Pu Lalhmangaiha Sailo, tuna C.Z Huala M/S Headmaster ni ta te, Pu Nelawma, Trade & Commerce-a thawk ta te, Pu Lalnunsiama, Missionary ni ta te pawh hian reilote te min zirtir hman.

Kan pawl 5 zirlaia Pawl 6 a pakhatna, Lalnuntluanga kha Ph.D te neiin, Mizoram University-ah Reader te hial a lo ni ta a. Pawl 7-a pakhatna thin Jenet Lalrinngheti te pawh Govt. HSS, Zemabawk-ah English Deptt. Lecturer te hial an lo ni ta. Kan sikul kai ve hunlai atanga kum 20 a liam a, Govt. M/S, Zemabawk in Golden Jubilee a lo thleng a, kei lah chu buai em emin ka phi ruai si. Ka hun neih hmasakna berah he Article ziah hi ka tih theih tawk chu a ni ta mai rih a nih hi.


01032008
................