KAN ‘SIR’ TAK KHA AW……

A sikula kan luh hma atangin tawhin an kawmthlang lawkah kan awm thin a, ka hre tawh. Pa zahawm an tih ang chi hi a ni a, Pa hlauhawm erawh a ni lo. 1990 khan a sikulah kan lut tan a, 1993 kumtirah kan chhuak thung. Pa mak danglam tak a ni. Vawi khat pawh, Mizoram School Games kan thlen dawnin, Pu Lura, Education Director khan zing lamah thu a sawi dawn a. Mizorama High School naupang luhlul chin lo pungkhawm an ni bawk a, tumah an pawisa lo, an chiar nuai nuai tawh mai a. Thusawitu thusawi pawh a hriat hleih theih loh. Chutih lai tak chuan kan ‘Sir’ chu a Room atangin a rawn chhuak a. A lo thlen chin chin chu a reh ta hmak hmak mai a. Thusawitu thusawina bulah chuan a va ding ve ringawt a, engmah a sawi ve lo. A hma lawka phun nuai nuai pawh a reh ve chawpchilh nghal daih mai!

Hun engemaw chen kha chu Zemabawk hian miropui, veng pawnah pawh kan chhuan, veng pawna mite pawhin a chanchin min zawh fo chu amah kha a ni. College leh University lamah kan luh hnu pawhin a thurawn kan la fova, Zemabawk Zirlai Pawl lo din a, khawtlang tana zirna lam hawia ke kan pen dawn apiangin a thurawn kan la ziah thin. Zep thu a cheng lova, Official level-a nawrna na viau lo se’ng chuan Zemabawk hian Higher Secondary School hi tunah hian kan la nei lo mai thei a ni. Politics level-ah chuan a hunlai khan kan hlawhchham a ni. Zemabawk sikul tam tak, khawtlangin kan din te hi sorkarin min laksak zung zungna hnar pawimawh tak mai a ni. Ka tawng tu huatthu suhah, a tel loh chinah chuan kan sak talh mai a ni.

A thurawn min pek, kan bawhzui a, kan tihhlawhtlin theih loh; mahse, kan zirlai hruaitu fel tak takten an bawhzui theih chuan thil tha tak mai tur nia ka hriat reng chu “Government Primary School (English Medium) neih’ hi a ni. Zemabawk mi leh sa, sap tawng pawh duh tawka hmang thei hi vengchhung leh veng/khaw dangah an thawk teuh a, chung mite chu lakhawmin, Primary School 4 kan neih zinga pakhatah hian lakhawm ta ila, chutah chuan English hlirin zirtirna pawh pek ni sela, chuta lut tur chuan tlema mi harsa zual deuh te chu duhsak nghe nghe ila a ti thin. Tihhlawhtlin theih nisela’ng a va duhawm dawn em!

A mimal taka amah ka hlawkpui dan phei chu sawi sen chi rual a ni lo. Amah ang kha Zemabawk hian kan nei tam lo. Mi bik a ni tlat: Sir, R. Lianhlira zawng.

Hawh u, amah hriatreng nan hian Zemabawk Higher Secondary School Alumni Association I din teh tak ang u. Pu H. Zalawra’n min huikhawm se’ng, Pu Lalthiamsanga Sailo MPS ho ngei hian, Mizoram University lam atangin Dr. Lalnuntluanga’n min ho thei se, MPSC lam atangin Pu Vanrambeiseia, Dy. Secy. hi tel ngei bawk se………


09102007
.......