Kan ram hian chhan a ngai a, a ‘min chhan ru’ tiin a auva. A chhan turin mi tlemte an pen chhuak a. Midang chuan kan nuih mai mai si.
Thudik a awm a, thudik lo a awm bawk. Heng te hian mihring nunah bu khuar tumin tan an khawh reng a, a luhna tur mihringa chu mi rinawm lo anih chuan thudik lo hi a lut thuk zawkah a tang a, mi rinawm nunah chuan thudik a fu thin.
Khawvel hi a mum a, a vir bawk a. Chu chuan vanneih hun te, vanduai hun te a her chhuah pui a. Mihring dam chhungin ngai rengin a awm theih loh. Eng hi nge kan damchhan chu ni ta ang?
Mihring hi ngai reng a awm tur kan ni lova, hmasawn tur kan ni. Kan hmasawn tumnaah chuan thlantui far zawih zawihin hna kan thawk tur a ni a. Chutiang tura Adama leh Evi fa hrin te kan ni. Awlsam taka sum hmuh te hi Pathian remtihna a ni ngai lo. Miin thlantui far zawih zawiha hmasawn tuma a thawh a chunga a neih tur thil, a chanvo tur reng a chang hi a lawmawm a, a chang lo anih erawh chuan a kawng daltu chu tupawh nise a kit thiangah ngaih chi a ni dawn lawm ni?
I rilru a vakvai a, I beidawng a, khawvelah beiseina I nei tawh lova. Mi zawng zawngin an thlir thup che niin I inhria a, tanpuitu tur che han auh mai tur pawh nei tawh lovin I inhre thin em?
Chutiang atanga beiseina neih leh chu thil har tak a ni a. Mahse, bei hram chunga, ‘khawnge vawi khat chauh’ tia han insang phek leh te hnenah hian MALSAWMNA chu a awm thin.
