VIGILANCE AND MONITORING COMMITTEE (VMC)

 

Mahatma Gandhi National Rural Employment Guarantee Scheme hlawhtling taka kalpui kawngah hian khawtina Vigilance and Monitoring Committee (VMC) din theuh hi thil tul leh pawimawh tak a ni a.  MGNREG Act, 2005, Section 13-naah hian ‘Panchayat’ ten supervision leh Monitoring an tih tur anih thu a tarlang a. Section 15-naah Programme Officer mawhphurhna pawh tarlan a ni bawk a. Mizoram sorkar ina Ni za Inhlawhna chungchang a Rules leh instruction a tih chhuah tawhah 2014 a VMC Guideline a rawn tih chhuah ah hian Village level lang lovin, District leh State lam a lang thung.

 

MGNREGA Operational Guideline First Edition (2005) para 10.7 ah VMC tih tur leh mawhphurhna tarlan a ni a, Second Edition (2006) para 10.7-ah a ngai ang deuh chiahin a rawn dah a. Third Edition (2008) para 10.1.2 ah pawh rawn tarlang nawn lehin member hi 9 ni turin a rawn sawi a. An hnathawh kawngah pawh DPC leh PO mawhphurhna anih thu a rawn tarlang a. Fourth Edition (2013) para 13.6.4 ah rawn tarlang lehin, member hi 10 ni turin a rawn ti a, a zah ve hi hmeichhia ni turin a rawn ti nghe nghe a ni.

 

Master Circular, 2020 – 21 ah hian Chapter 10 a Social Audit huangchhungah VMC hi a rawn dah a. Para 10.1.12 ah hian Concurrent Social Audit ti tu turin VMC hi hman tur anih thu a rawn tarlang a. Para 10.4.3 ah hian VMC hi khaw tinah din turin a ti a, member pawh 5 ni turin a rawn sawi thung a, hnam hrang hrang inpawlhsawp turin a rawn ti a, a zahve hi hmeichhia ni turin a rawn ti bawk a ni. Vantlang Rorel inkhawm (Gram Sabha) thlan/ruat tur a nih thu tarlan a ni.

 A chunga instruction hrang hrang leh Mizoram in 2007 atanga kan lo kalpui tawh dan angin hetiang hian VMC din chungchang sawi ta ila :-

 A nihphung :

•       VMC member nih hi hna zahawm (Honour job) a ni a, khawtlangah pawh mi rinawm, tumah ina thil diklo an tih tir theih loh tur mihring an ni tur a ni.

•       Tlawmngaih chhuah tak meuh hna a ni a, mipui rilru sukthlek siam that tum mihring an ni tur a ni.

•       Rilru dik lo leh kawisawi mite telna tur a ni lo.

•       Politics lama chungchuan tumna leh phuba lak tum te tel ve na tur a ni lo.

 A din dan tur :

•       Programme Officer (P.O) in a din ang.

•       Khawtinah VMC hi din theuh tur a ni.

•       V.C khat huamchhungah VMC pakhat a awm thei a, Sub Village-ah pawh pakhat a ding thei.

Inthlan dan :

•       P.O in inthlan hun hriattirna siam lawkin, a mah emaw a staff te emaw kal chilhin an inthlanpui thei.

•       Vantlang Rorel inkhawm (Gram Sabha) in an thlang ang a, VC/VEC ten ruat loh tur a ni.

•       Inthlan dan tur chu inthlanpuitu thu thu a ni a, kalkhawm te atanga inruat emaw, voice vote hmang emaw Secret ballot hmanga thlan emaw a theih ve ve ang.

•       VMC member-ah hian Village Employment Council (VEC) Executive member nilai tumah an tel thei lo.

•       MGNREGS a thawktu tumah an tel thei lo.

•       NGO emaw, pawl engpawhin MGNREGS hnuaia hna a hmuh chuan, chu ta hruaitute chu VMC-ah hian an tel thei lo.

 

Member zat tur:

•       Khawtinah mi 5 thlan chhuah tur a ni.

•       Mi 5 atang hian Office Bearer turin inruat chhuah leh kher hi kan Dan lam hian phut chiah lo mahse, kan lo tih thin tawh angin Chairman, Vice Chairman, Secretary leh Asst. Secretary inruat chhuah ni thei se.

•       Kan lo tih tawh thin angin, khaw lian deuhvah chuan hei aia tam pawh VMC member neih theih tho a ni. Mahse, number inkawpkim lo ni thei se.

•       A zahve tal chu MGNREGS a inhlawh thin an ni tur a ni a, Hmeichhia ruat/thlan tel ngei tur a ni.

 

A hunchhung :

•       VMC member te hi kumtin thlan that ziah tur a ni a. Kumtin tih hian Sorkar kum hman tur a ni. (VEC thlan rual hian tih a rem viau)

•       Laklawh thila VMC member pakhat emaw a then emaw, an vaia an bang emaw anih chuan an aiawh a rang thei ang berin mipuiin an thlang tha tur a ni.

 

An tih tur :

•       Sanction order reng reng P.O in VMC te a copy a pek ve zel hi a mawhphurhna a ni.

•       VMC ten engemaw vanga a copy an dawng lo palh anih pawhin Concurrent Social Audit an neih dawn chuan P.O hnenah dil chhuah tur a ni.

•       A chunga kan sawi hi an khaw chhunga MGNREGS atanga hnathawh reng reng a huam (Wages leh Material telin).

•       Sanction leh Estimate nen, VEC te hnathawh chu a inmil em tih an en tur a ni.

•       A hmuna kal chilha en ngei hi VMC te tih tur a ni.

•       Hnathawh lai te, thawh zawh hnuah te an en thin ang.

•       A dik lo lai a awm chuan VEC te hnenah hriattirin, an siamthat tir leh thin ang.

•       VEC te hnathawh chu an zawh veleh VMC ten an endik ang a, a that chuan Completion Report an pe ang a, a that loh chuan an siamthat tir leh ang.

•       V.C te hian an siamtha duh tawh lo anih chuan VMC te hian Completion Report form-ah a dik lohna lai leh siamthat tulna lai chiang takin an tarlang.

•       An Report hi District Programme Coordinator (DPC) leh Programme Officer-ah thehluh tur a ni.

•       Hnathawh zawh (vawikhat sanction lo kal zawh) apiangin Report hi ziah thin tur a ni.

•       VMC Report hi vawn that a, Vantlang inkhawm-a inchachhuah hun (Social Audit) neih hunah sawi chhuah thin tur a ni.

•       Concurrent Social Audit ti turin ruat theih an ni.

•       Social Audit Unit lamin ‘Audit’ an neih huna lo puihbawm hi an mawhphurhna a ni.

 

VMC TE TIH LOH TUR :

•       V.C te hnen atangin emaw midang hnen atangin emaw engmah hlawh a beisei tur a ni lova, lawmman pawh a loh a luakchhuak khawp a beisei tur a ni lo.

•       Lawmman hi Administrative Cost atangin emaw Wages Component atangin emaw P.O in ruahmanna a siam sak thei.

•       Nitina a thawh chhuah ve kher a tul lo.

•       VEC te ang maiin mipui hnathawh a vilpui ve kher a tul lo.

•       V.C te nena inkarah harsatna a thlen palhin huai takin thudik a tan mai tur a ni a, buaina siam zawngin a khawsa tur a ni lo.

•       Harsatna an tawhin Programme Officer in an harsatna a chinfel sak thei a ni tih a hrereng tur a ni.

 

A DANG :

•       VMC leh VEC te inkara harsatna leh buaina a awm chuan P.O kalin emaw a aiawh emaw kalin a ching fel tur a ni a. Khaw thenkhatah VMC leh VEC inhal rengna a awm chuan VMC hi din lo pawha transparent taka thil kalpui theih a nih tho chuan P.O in aiawh siamin VMC angin an function thei thova, P.O thuneihna a ni e.

 

(He thu ziak hi a sorkar thu chhuak a ni lova, sorkar thu chhuak awm tawh hmanga ziah erawh chu a ni thung. Thil chiang lo leh fiah lo a awm chuan anmahni bialtu P.O hnenah zawh fiah tur a ni e)