Search This Blog

November 15, 2012

AIZAWL NORTH COLLEGE KHA



Ka nu in Principal, Pu Rinawma kha a baa in admit a va dil ve tawp mai a. Tlem azawng pein Aizawl North Collge-ah chuan ka lut ve ta a ni !

Pawl 10 kan zova, Pachhunga University College a luh ve hi ka duh thin khawp mai a. Mahse, kan chhungkaw dinhmun ten a zir  loh vangin, chhun lama inhlawhna zawn pahin khatih hunlaia zing College tha ber, Aizawl North Collge-ah khan loh theih lohvin luh a lo ngaih phah ta a ni. Kum 1994 te kha chuan Aizawl North College hi a lun khawp mai a, P.U (Arts) zawng pawh kha mi 600 chuang kan ni. Section 3-ah min then a, chuti chung chuan Section ‘C’  hote kalna tur Class room a awm loh avangin tuna SCERT kawta Middle School Classroom –ah khan kan inhnawh thin a, English leh Mizo class ah phei chuan thutna tur chang lo hi bang kila kan ding fur zel !

1st Year P.U a kan picnic kha a nuam pawl a ni. Tuirial-ah kan Picnic a, thingpui lum a buaithlak e tiin mipa bazar ho khan tualchhung Zu ngat mai 20 litre an rawn la hem mai a ! Tlai chaw ei dawna an han in tak tak mai kha chu pui tak kan ni ! Kan insual hlawm ngei kan rin avangin, chaw kan ei sawk sawk a, kan chho daih mai a. Tuirial leihlawn atang hian insual kan en a, insual buai an tam hnuin Tuirial pa ho an zuk chhuk a, an hlap pawp pawp mai !

Pu Lianzuala (HBC) hian English hi kan College-ah khan min rawn zirtir ve thin a, a thiam hi  kan han ti mai mai khawp a, a kamsirah te khan a chil a phuah buah buah mai thin a, a tui thin khawp mai ! Pu Rualchhinga (RIP) mawlh mai kha, inzirtir a thiam zia chu a rapthlak zawk ! Pawl 3 vela “There’s a lovely Bird” kan zir kha a awmzia ka hrechian chiah mawle. Kan zirlai hi a bu siamtuten kawnghmang neia uluk taka an duan anih zia kha, khata tang khan ka man pha ve chauh mai !

Pu Rokamlova (Ex-Minister) tawngkam hawh ila, PUC ho kha “Pupil’s Unfit for College” tihna anih zia hre lo khan nuam kan han ti em em khawp a. Inti kawlezi kal tak mai khan kan then vel a. kan engthawl phian mai !

Hmai phih mumal lovin, mit ek kan nuai thla tawp a, kan veng atangin zing Bazar Bus-ah chawhmeh nen inpawlhsawp nuaih maiin First period nan hman loh hlau takin kan phe dawrh dawrh a, Slipper nena thawh chhuah chang a lo awm lo thei lova, kan zirtirtute kha an lo fel ngawt mai.

Hmeichhe kawm hi nuam ka ti thin a, tlema hmel eng deuh han kawm phei chu a nuam dangdai ve a. Ngaihzawng an nei lo nia kan ngaih, inngaihzawnna tel miah lova inkawm hi a nuam hranpa ve reng reng a. Amaherawhchu, ngaihzawng nei lo nia kan ngaih lai renga, kan inkawm ngeih tawp hnuah an bialpa te nena an intihbuai thu min han hrilh te kha chu ngaihthlak a nuam fahran lo ! Tlema lo ngaih-varun-thawn deuh reuh te an nih phei chuan a nuam lo lehzual !

Kan thiannu pakhat, ka kawm fal deuh hi a awm a. Nula hmeltha tak, ngo lam deuh (a hming… ka hre chhuak zo tawh lo !) inkhaithli thlarh mai hi a nia. Kan class mipa thenkhat chuan min dem bel ve thin a. A ruk tak chuan ka lawm rilru thin khawp mai a. Tumkhat chu DIET ho Hmawng thing hnuaiah hian Class off meuhvin kan thu dun a.

“Engemaw thil te te ka hrilh duh che”

A tih tlat avanga chutianga awm chu kan ni.

Kan thutdun tak hnu chuan a rilru a thil awm chu min hrilh ta a. A bialpa chu Pachhunga College-a III years B.Sc zirlai a niawm e, in ruk mai an lo rel hi a niawm a. Ka thurawn a duh lek chu niin, ka buai ngei mai ! Eng thil nge ka rawn tih pawh ka hrechiang tawh lo. A hnuah an khaw lamah a haw ta ni ngei tur a ni, a reh ta vang vang mai a. Tu nupui tak chu ni tawh ang maw ?

Ka inkhel ngai lova, ka thian kawm te chu inkhel mi an ni. Inter College-ah an thawmhnaw kengtu-ah min hmang thin a, ka lawm thei em em mai !

P.U kan zirlai hian Pathian thu awih lovin, Pathian ka fiah a. 1st Year kha ka tichhe em em mai a. 2nd Year-a kal luh theih tho dawn avangin ka lo inthlahdah a. Mahse, vanneihthlak takin, ka pass hlauh mai ! 1st Year Exam dawnah ka thiam si lo, ka mangang kha ka tawngtai tawp a, “Lalpa, I awm tak zet anih chuan min pass tir ngei ang che” ka ti a. A awm zia ka hrechiang fu mai !

P.U ka zawh veleh phai lamah thil engemaw zir tumin ka chhuk ve ngawt mai a. Zir man a lo sangin, lehkha thiam tak tak a lo pawimawh nasa mai si a, ka hlawhchham a, ka lo let leh a. Mahse, kum khat chu ka hloh ta phawt mai a ni.

1st Year B.A pawh a ba bawkin ka in admit leh a. Ka Mark hmuh thatna ber, ka tui a ni tih ka inhriat lohna History Honour ka la ta a. Mithiam lutuk Miss Hmingi ten min han zirtir a, ka man viau thin naa, ka saptawng thiam loh vangin, ka man zia ka ziakchhuak thei lem hlei lova ! Sir Luran Saptawng leh Mizo tawng inpawlh nawkin, rang takin min han hrilh thin a, thahnem a ngaih ang hu chuan kan dawngsawng thiam tawk lo thin. Sir Paul-a hi N.E history kha a thiam ka ti thin, Sir, Patean an UCC kal lai chanchin tel ngei maiin lecture min han pe a, bengvarthlak thin ngawt mai.  An zirtir naupang te kha kan kaw lo em mai thin pawh a.

Vanneihtlak tak maiin, 1st Year B.A History Honour la zingah khan khami kum khan kan College atanga a clear awmchhun ka lo ni hlauh mai a. Chu chuan ka kawng thui tak min sial sak ta a.

2nd Year B.A kan zir kumin Class Representatives hovin Students’ Union an dil chhuak a. Kalphung mumal tak duang nghalin, III BA atangin Vice President, II BA atangin General Secretary leh post dang zawng kha open turin an duang a. Hetih hunlai hian tu vak mahin min hre lo. Mahse, a hminga kan veng lama S.U hruaitu lo ni ve ta chu, Gen. Secy. Post kha chuh ve turin kan C.R ho chuan min nawr teh chiam mai a. Ka duh lo angreng khawp mai a. Mahse, min ti lui ta a.

Aizawl North College Students’ Union direct Election hmasa ber han chuh chu a lo namai lo viau mai a. Kan hmelhriat ngai lem hleih loh te kha han chibai te, han biak vel te kha a lo tul a. Ramhlun leh Chaltlang hi Vote bukna hmun deuh anih vangin Election dawn te kha chuan mitthi inah kan va tlaivar vel ! Zing leh zanah kan campaign a, College lamah Banner nen, Poster nen, Leaflet leh pamphlet te kan buatsaih a, kan buai ve thin hle. Vanneihthlak takin, Asst. Gen. Secy. atana ka hman, Remruata kha a lo hmeltha hlauhva, nula lam a hipkhawm thei deuhva. Chubakah I BA kha an tam hrim hrim mai bawk a.

Pawisa nei miah lovin, thian te zarah kan inhlangkai thei ve tawk a. Nuam ka ti phian. Khata tang khan MZP lamah kan han lut chhova; tin, Aizawl city chhunga College zawng zawng inzawmkhawmin Joint Students’ Action Committee on Scholarship te kha kan huaihawt a. Kawng te kan han zawh ang bawk bawk a. Pui tak mai chu, min fuihpawrh a, Aizawl Tennis Court-ah Mizoram Gazette min hal tir vel !

 III B.A ah kha chuan S.U lamah ka inhmang ta lo. Lalhmuchhuaka kha kan class in kan vawrh a, chuhtu awm lovin a kumleh kha chuan Vice Presidentah a tling. Amah pawh Presbyterian Pastor puithu tak mai a lo ni ta ! Khami tuma S.U O.B kan nihpui te zingah tunah hian Gazetted Officer 5 an awm a, midang pawh chhuanawm tak takin an awm hlawm. Kan nula neihchhun, Lalnunsangi pawh kha Mizo hmeichhe zinga Indian Army Officer hmasa ber dawttu niin tunah chuan Major a lo ni ta a. Khang laia eng vakah mah inngai ngai lo, ka Assistant Ruata nen an la innei tak deuh deuhva !  

Lehkha zir tha peih lo, nuthlawi chauh buaipui nia kan ngaih Thlangdika te takngial pawh inchai lamah kalin, Pu R. Vanlalduata a chai ngam a, Lammual-ah kan lo tan ve em em mai chu a nia ! Ngawi te, kan Asst. Magazine Editor, Chanchinmawia pawh kha Sangau lamah sorkar hna tha tak a lo hmu tawh a niawm asin !

Kan hnua a mite zinga khan Pastor 2 an chhuak thawt mai bawk ! Keini zingah kha chuan khati lam kha kan hawi nep deuh. Kan Vice President, K’u Zothangzuala Chhangte hi a thleng sang ber a, tunah Central KTP lamah nihna a nei a niawm e, Chanmari West Kohhran felna avangin Upa ah te chuan an la thlang tak deuh deuhva ! Kan Social and Culture Secretary thin K’u  Reuben-a kha chu Seventh-day a tui hre chin kha a nia.  La piangthar tak maw !?!

Kan S.U lai kha a ngaihawm. College Week in S.U leh Lecturer ho dinner inchawiin kan inkhel a, kan chawi a. Bung Bunglow-ah Dinner chu kan zut show a. Pu Thangkima hian tlaia ruih awihloh anih thu Bus-ah a puang vei pan pan a, haw dawn meuh chuan kan hotu, nula ho mawngah zu um ruakin a hlap taih taih tawh mai ! Kha ta ngam leh ngam lova kan lampui, Miss Maria-i te kha MCS Officer niin, DRDA Project Director fel ber mai zinga a mi te an lo ni ta ! Sir Sangtea of Economic thupekin Aizawl khawpui chhungah Cr.PC Section 144 hmangin leivung paih man theih a lo ni ta !. A va lunglenthlak mange !

Khawvel te hi chu a mum a, a vir zel ang a, a tawp mai pawhin a rinawm loh. Khawvel vir hian ‘hun’ a keng tel a. Chu HUN chu a hmang thiam apiang an nihlawh ang a, a hmang thiam lo apiang an vanduai dawn a lo ni mai a ni. Pathian hian khawvel mihring te hi HUN inang theuh min pe a. A chhawr tangkai thiam apiang an hlawk ang a, a chhawr tangkai thiamlo apiangin an hloh mai dawn chu a ni.

I zir puitlin ve hunah enge i nih ve dawn ?
---------------------------------
Ktp040420121430

MAHNI HUANAH NGEI NI ZA INHLAWHNA




Champhai bul, Chhungte khuaah hian Ni za inhlawhna an kalpui dawn hi i lo thlir lawk teh ang.

He khuaah hian In 50 a awm a, chung zinga in 45 chuan Job Card an nei. Heng Job card nei chhungkua zawng zawng hian kum 2011 atang khan Mahatma  Gandhi National Rural Employment Guarantee Act, 2005 schedule – I in ngaih pawimawh dan tur indawta a duan - Mahni Huanah ngei, Huan nghet nei tura a tihna chu an puitlin tlat mai le.

Mahni Huana thawk duh tur te chu Village Councils te hnenah an in Report a, in Report te atang chuan mahni a hma lo la tawh, Grape bul 50 nei chin leh thil dang kung 100 nei tling chin te chu hmalakna hmasaah an tang a. In report te atang chuan V/C leh VMC ten hmalak dan tur an duang thin. A changin an inlawm thin bawk.

Job Card nei, Huan nei rih lo te chu mi huanah feh tir thin an ni a. A changin, khawtlang pawimawh hna te thawh tir bik thin an ni. Heng mite pawh hi Mahni Huan nghet nei tura fuih reng an ni bawk.

Inhlawhna a lo chhuah apiangin, chhungkaw tin te chuan V/C leh VMC hnenah enge an thawh dawn tih anmahniin an in report phawt a. V/C leh VMC te chuan chhungkaw tin chu an thawh zat tur an lo bithliah sak nghauh nghauh zel a ni. Entirnan, Hlo thlawh tur neitu chu sanction ni zat milin a thlawh tur zau zawng bithliah sak a ni a. Thingtuai pu tur chu nikhatah thingtuai malpui tiat 1 thlen turin an ti a, Khur laitu chu nikhatah 3 ft. bial, 2 ft. a thuk, khur 2 lai turin an bithliah sak mai a ni.

Sanction thar a chhuah apiangin Vantlang inkhawm neih thin a ni a, chutah chuan hnathawh hun tur Dan-in a sawi ang te mipui hrilhhriat thin an ni a. Zing dar 9 ah an tan a, tlai dar 4 ah an bang leh thin.

An thawh zawhah, hlawh sem hmain V/C leh VMC ten an endik leh vek a, la thawk kim lo leh anih dan tur anga la ti lo te chu an thawh nawn tir leh a, an thawh zawh hunah chauh zel hlawh pek thin an ni. Thawh loh hlawh lak tum an awm ve lo ! Tin, Term hmasaa V.C.P chu V/C ah a tlin tawh loh chuan Vigilance and Monitoring Committee chairman-ah ruat zel mai a ni.

An hnathawh hi hlawkpui an inti tlang hle a ni.

He khua hi IWDP Saikah project in a huap a; mahse, installment tawp lamah DRDA, Champhai hian a la ve chauh va; chuvangin, duh angin fund a awm theilo nachungin IWDP leh Mahatma Gandhi NREGS te hi a theih dan kawng kawnga tankawp tir an ni.


---------------------

LUNGLEI DISTRICT CHHUNGAH WATERSHED MANAGEMENT PROGRAMME HNUAIA HMALAKNA CHHUANAWM BIK


 
Mizoramah hian kum 2009 – 10 atangin Integrated Watershed Management Programme (IWMP) Project 16 hmangin bul tan a ni a. 2010 – 11 khan Project 16 bawk awm lehin, 2011 – 12 chhungin project 14 a awm leh a. Tihian, tun thlengah Project awm zat chu 46 a ni. Project 46 zau zawng hi hectare Nuai 1 leh sing riat chuang a niin, project pumpui enkawlna atan cheng vaibelchhe 27 chuang zet ruahman a ni. A senso tur hi Central in zaa 90 a tum ang a, State sorkarin zaa 10 a tum thung dawn a ni.

Lunglei District chhungah hian tun thlengin IWMP Project 10 a awm mek a. A project pumpui len zawng hi hectare sing 5 a niin, cheng vaibelchhe 7.5 senna tur a ni.

Lunglei District chhunga Project te hi hlawhtling taka kalpui anih theihna turin Project Manager, District Watershed Development cum Date Cell leh a thawhpui te chuan nasa takin tan a la a. Project Implementing Agency (PIA) atan pawh Soil and Water Conservation Officer, Block Development Officers, Horticulture Development Officer leh All Mizoram Farmers Union (AMFU) te a hmang mek a ni.

Tun tumah hian PIA atana hman mek, Soil & Water Conservation Department, Lunglei ten IWMP hnuaia Rain Water Harvesting an siam leh chuta tanga User charge an lak dan te bakah Entry Point Activities atanga an thil siam hrang hrang, mipuiin an chhawr tangkai dan hi a entawntlakin, a chhuanawm em avangin lo tlir ho ila.

Ruahtui tlak tamna hmunah, a khawl khawm dan thiam tawk loh avanga kumtin Thal laia thingtlang miten harsatna an tawh fo thin chu Rain Water Harvesting Tank tha tawk siamin a sutkian theih a ni tih Zote South leh Kanghmun South khuaa IWMP hnuaia hmalakna atang hian a hriat theih ang.

Heng khuaah te hian hmun dang atanga Tui lakna tur a awm lova. Khawchhunga Tuikhur an neih te pawh Thal lai, March atanga May chhung hi chuan a kang chat a, Ruahtui dawn khawlna tura In tinin an neih, an Tuizem te chu a tet avangin Fur-ah chauh a hman tlak a. Khaw mipui ten Tui in tur lamah harsatna namenlo an tawk thin a, hengte hi Watershed Programme hmangin sutkian tan mek a ni.

Zote South khuaah hian Watershed Programme hmangin Litre sing 6 chuang dawng Rain Water Harvesting Tank 2 siam a ni a. A chung atan Rangva hmangin, Ruahtui luan luhna tur tha tawk tak siam a, a khah lutuka luanchhuahna tur pawh tha tak siam a ni. Kum khat chhungin Tanky pakhat hi a khat hman tawk vel chiah a ni.

Common Guideline of Watershed Programme, 2008 in a sawi angin, kum 2010-a Project kalpui tan anih dawn khan Entry Point Activity atan Watershed Committee leh Village Council te chuan PIA kaltlangin ruahmanna an siam a. Vantlang Rorel Inkhawm (Gram Sabha) in an ruahmanna chu a pawmpui hnuah cheng nuai 7 leh sing 5 sengin he khuaah hian hmalak a ni ta a ni.

Rain Water Harvesting Tank siam zawh anih hnu hian Watershed Committee chuan “Tui Committee” a din a. “Tui Committee” hian tlawmngaih chhuahin Tuizem enkawl, a sem leh a hralh kawngah mawhphurhna engkim a la vek a ni.

Kumin thal chhung khan Tin 1 hi Rs. 1 in mimal hnenah an hralh a, an hralhna pawisa tlingkhawm chu Tanky 1 ah Rs. 1400/- a tling; Vantlang tan leh Chhiatna thatniah a thlawnin sem chhuah thin a ni bawk. Thal laiin karkhatah vawi 2 an sem a, chhungkaw 1 in Tin 10 zel an dawh thin.

Tui semna (User charge) atanga an pawisa hmuh hi Watershed Development Fund –ah lutin, Tuizem tihfai nan leh tul tulah “Tui Committee” hian an hmang a ni.

Kanghmun South-ah hi chuan Mahatma Gandhi NREGS nen kalkawp tir (Converge) a ni thung a. A hmun laih, Lung lak leh a thiar vel hna hi mipuiin an thawk a. A chhuat chhun leh a bang hi IWMP pawisa cheng nuai 5 leh sing 7 senga thawh a ni. A chung RCC hi Mahatma Gandhi NREG Material Component hmanga thawh a ni  thung.

He Tuizemah hian Litre nuai 4 leh sang 5 a leng a, a dung fit 50, a vang fit 40 leh a thuk zawng fit 8 a ni. Ruahtui luhna tha tak siamin, Filter thlap a ni. He Tuizem-ah hian a lak chhuahna tha tak siam a niin, a thlang lamah PHE Tuizem nen zawmin, Vantlang tana sem chhuah a ni a. Kumthar atang hian Tin 1 Rs. 1 in hralh chhuah tura ruahmanna siam mek a ni.

Entry Point Activities hmanga kanghmun South, Ramlaitui leh Sekhum khuaa Waiting shed, Bazar shed leh  leh Zun in an siam te hi a dangdaiin a chhuanawm hlawm hle mai. Hengah te hian a hranpaa Architect rawih a awm lova, a mawi tur, tha tur leh sum senso tlem tur hmalak a ni. PIA leh a thawhpui te hian mut mawh hnar mawhin an thawk a ni tih a hriatreng mai.

Zun in te hi Mipa leh Hmeichhe Zunna a hranga siam a niin, a chhung awm dan pawh hi tihfai awlsam leh thinghlim taka vawn a ni. Mipa zunna tura siam hi han en ila, zunin a per theih lohna tura daidanna siam thlap a ni a. Floor tile phah thlapa a ni bawk a. Pawn lam atanga hmuh theih loh turin a hliahna pawh a kul mawi tawka siam a ni. Zun in pakhat siamna atan hian cheng nuai 1 leh sing 1 chauh sen a ni !

Tuna kan en mek Waiting shed hi Kanghmun South khuaa mi a ni a. Cheng nuai 1 leh sing 5 chauh sengin hetiang hian an siam thei a. Ban 2 chauh neiin, mawi leh tha takin an siam a. Hetiang anga siam hi Mizoram-ah chuan a hmasa ber nia hriat a ni.

Ramlaitui khuaa cheng nuai 6 lek senga sak Bazar shed leh Sekhum khuaa cheng nuai 4 leh sing 8 lek senga sak Bazar shed te  hi a khua cheng mipui ten an chhawr tangkai hle mai.

Heng Bazar shed enkawl tur hian Watershed Committee hnuaiah “Bazar Committee” an ding hrang a. He Committee member ni tur hian Membership fee Rs. 50 pek a ngai a, Annual fee Rs. 20 kumtin an pe bawk thin. Bazara thute hnenah hian User charge atan Rs. 10 kartin an khawn bawk thin a. Chungte chu Bazar enkawlna atan leh Electric hman man atan hman thin a ni. A len zawngte hi fit 30 leh fit 10 a niin, a liang hi fit 8 a sang a ni a, Ceiling nei thlapa siam a ni. Hengah hian mi 10 – 15  zel an thu thei a.



January 12, 2012

IN KAN SA VE A.

Kum 2008 kumtawp dawn khan Pu Valte, Rural Bank Manager, Kolasib Branch hnenah Loan min pe ve turin ka dil thin a. A hmain kum 2006 khan Car Loan ka dil a, awlsam takin min pe mai a, chu chu an tihdan ang thlapin ka rul thei a. thlatin Rs. 4500 in kum 4 leh a chanve rulh tur a ni a, ka rul zo thawkhat tawh a ni.

Kan awmna, Zemabawk North-ah hian kum 1983 atangin kan awm tan a, mahni pualin In kan nei lo. Tichuan, a hminga sorkar hna kan han thawh ve takah chuan zantin, nitina ka ngaihtuah thin chu mahni puala chenna tur In neih a ni.

Vanneihthlak tak maiin, Pu F. Thanhrangan kan awmna hlui, Dinthar vengah a inhmun a hralh phal tih ka unau ten min hrilh a, kan indawr a. An chenna 18 X 53 ft. chu a in chawpin Rs. Nuai 2 in a phal a. Cheng nuai 1 leh singruka lei turin kan inrem a. Arrear ka lak, cheng sing 6 chu advance atan ka pe lawk a, a LSC chu Loan lak nan min phan tir ta a.

Tichuan, Rural Bank lam chuan thla 1 velah min tihfel sakin, in dingsa leina atan cheng nuai 5 min puktir ta a. A pawisa fai chu kengin Pu F. Thanhranga In, Zemabawk North a mi ni cheng nuai 1 chu ka pe leh ta a.

In leina atana ka tih a bang cheng nuai 4 lai mai chu In sak thatna atan kan ti a.

Mahse, vanneihthlak takin Pi Lalrinchhani, Chaltlang a awm chuan kan thenawm lawka in dinglai chu a hralh duh tih ka hre leh ta a. He in hi cheng nuai 5 pawha an dil huai huai a ni a. Kan va be ve ta a. Kan va kal chu, a vanduai asiamin, a inluahna ten an lo hnawtchhuak dawn a, inluah man atan a fridge an lo lak sak tuk tak mai a ni a. Kan remchang bawk nen, a inluah man kan pek sak ta nghal a. Mahse, a inhmun LSC bera chu an chhungten an lo dahkham sak hi a lo nia.

Tichuan, an dahkhamnaah te kan va kal a, cheng sing 5 a an dahkham chu cheng nuai 1 leh sing 9 lo chuan lakchhuah a lo phallo chu a lo nia. Mahse, kan va kal vawi 2-naah chuan an dahkhamna nu chu a lo piangthar hlauh mai a, awlsam tein a tihzat ang tho chuan kan la chhuak thei ta a ni.

Vanneihthlak takin Revenue lamah kan han kalpui chuan, a thawk te chuan min lo duhsak a, harsatna engmah tawk lovin LSC pawh min lo tihfel sak ta mai a. Tichuan, a inhmun dahkhamna te nen tel vekin Pi Chhani hnen atang chuan cheng Nuai 3 leh sing 5 chuan inhmun tha tak kan lei leh thei ta a ni.

Ka loan lak kha Nuai 5 ani ka tih tawh kha. Tichuan, a bang cheng 5 chuan Thingzai kan lei lawk ta a.

A sakna tur pawisa kan nei thei lo reng a. Ka ngaihtuahna hian ka sa thin a, kum 2 chhung chu ka rilru hian in ka sa thin. Zanah a sak dan tur ka ngaihtuah a, ka hisap vak vak a, a lem ka ziak fo bawk. Ka sum dinhmun ka en a, engmah neih kan nei lo ti ila, In sakna atan thlatin cheng sang 5 atang sing 1 vel hi ka hlawh atangin kan khawl thin a. Vanneihthlak tak maiin Arrear ka la leh hlauh mai thin a, chungte chu bank-ah kan dah zel bawk a. Tin, ka vanneihna a kal tluang a, IWMP Project thar a lo chhuak a, Project tin tan DPR siam a ngai a. PIA ten anmahnia an siam thiam loh avangin min rawn thin a, siam sak tur tein min ngen hlawm a. Ngenna ka dawn zawng zawng phei chu Project 7 vel lai ani. Project pakhat DPR siamna hi cheng nuai 5-6 vel a ni. Sorkar hnathawk chunga chutianga Consultancy firm anga lo tih chu a rem chiah loh avangin kan pu (Director) ka rawn a. Anni min thurawn angin, PIA te kan be leh a, a thiam lo zual te chu an project a, kal chilh a DPR siam zirtir paha puih turin kan inti a. Ka kalna senso zawng zawng leh Lawmman min pe dawn a ni. Chutah chuan kan Director min remruatpuinain Lawngtlai leh Lungleiah ka phei ta a. Soil Deptt. D.O, Pu Chunga te nen chuan an Ni 2 inzirtirna kan neih bakah PRA tih theihna khaw 5 ah PRA kan tihpui a, an DPR a mi tur Action plan te a hmunah kan duang ho ta a. Hemi atan hian lawmman-ah ka Motor Hire-na leh thlen man min pek sak hnuah cheng nuai 1 min pek an tum a, a tam lutuk ka tih avangin a chanve, cheng sing 5 ka lak sak a, an lung a awi lo lek lek lehnghal !

Lawngtlai ka zawh hnuah Lungleih phei lehin, Pu Bana, D.O Soil leh Pu Hmaa, BDO ten min lo mikhual a, an hnenah Ni 2 ka cham a, Sekhum-ah PRA kan tihpui bawk a, a bak hi chu an lo chhunzawm atan ka dah a, Theory class ni 1 kan nei bawk. Lawmman atan Soil ho hian cheng sing 5 min pek an tum a, cheng 25000 chauh ka laksak a, BDO erawh hi chu ka laksak lova, ka thlen man chauh ka laksak thung. Tin, Kolasib pawh ka hunawl neih remchan laiin ka pui bawk a, zanah PRA te ka tihpui a, a siam an atan cheng nuai 1 min pe a, cheng sing 5 chauh ka laksak ! Ka thawhrimna nen cheng nuai 1 inphu lovin ka hre deuh a ni !

Tichuan, ka DPR siam hlawh te, ka arrear lak leh thlatina ka hlawh atanga kan saving ve atangin cheng nuai 2 vel chu neiin kan inhria a. Thingzai In sak tan kan tum ta a ni.

Kolasib-ah UD & PA hian mirethei in sak sakna turin cheng nuai 1.5 vel pein, in tha tak tak an sa thei tih ka hria a, chung zinga mi 1 chu kan kalkawng anih avangin ka zawt chik a, anni chuan a ban leh Beam RCC in a ti thlap mai a. A ban leh Beam tal RCC-a tih ka rilruk leh ta a !

Tichuan, 2010 February Ni 3 atanga tanin in sak hna chu Zemabawk-ah cheng nuai 2 vel neiin bul kan tan ta a ni.






 Engpawh nise, a tha emaw, a chhia emaw, kan in sak a ni a. Tin Eirukna leh thil thianghlim lo awm miah lova kan sak anih angin kan lawm em em a ni. He thu ka post lai hian kan la sa zo chuang lova, a chhung engmah chei a la ni lo. A hnuaiah hian ka naute chhung an awm a, anni hian an nghak a. Aizawl-a kan haw changa kan thlenna atana kan tih a ni a, pawisa remchan dan ang zela chei kan la tum ang chu..

Vanneihthlak takin, kan nu hian a Secondhand dawr atanga a lo khawl cheng nuai 1 he in atan hian a rawn thawh bawk a. Tunah hian a vawiin cheng nuai 3 leh sing 2 vel kan seng tawhin ka hria. Kan thil leina zawng zawng hi nitin ka ziak veka a, item wise in ka dah thlak a ni !

LALPA, IN MIN PEK AVANGIN KAN LAWM E