#Radiotalk1 VILLAGE COUNCIL DIN DAN LEH NIHPHUNG

 

Tun tuma kan Programme atana chuan Mizoram-a Village Council din dan leh nihphung a ni dawn a. Kan hriat theuh angin Mizoram a Autonomous District Council 3 area tih lovah tunhnai lawk khan Village Council kan inthlang zo chiah a. Executive body pawh rem fel mek a niin, sorkarin approval a pe chho mawlh mawlh a. Hemi chungchanga hian Central sorkar, Ministry of Panchayati Raj in Local body te training-na atana a rawn pawm leh fund te pawh a rawn pek, State Institute of Rural Development & Panchayati Raj, Mizoram, Durtlang Leitan hmuna awm mek chu kan han tlawh a. Vanneihthlak takin Director zahawm tak, Pu Lalhmunsanga Hnamte an kan sawi lawk tawh angin remchang min lo siam sak a. An Senior Core Faculty zing a mi, Pu Khuangthansanga Pakhuangte nen inkawmna hun tha tak kan nei thei dawn niin kan hria a, kan lawm tak zet a ni.

Q : Pu K.T chibai le. Hei i lo hriat tawh angin V/C kan han thlang thar leh ta chu a nia, hemi chungchangah hian han kawm che kan chak deuhva, I rem thei angem aw ?

A1 : Chibai le, Remchang tehreng mai a. Englam pang nge kan sawi ang aw ?

Q : Ka han zawh duh che chu Mizorama Village Council kan neih tan dan leh eng dan hmangin nge kan neih tih hi min han hrilh hmasa la tiraw ?

A2 : Mizoram hi Lal awpna hnuaiah kum 300 dawn lai kan awm nia hriat a ni a. Khawchhungah Lal leh Upa te thurel chu Rorelna tawp a ni a, a chung lamah zualkona a awm lo. Kum 1895 a British sorkarin min rawn awp achinah Lal thuneihna chu tlem tlema tihdanglam hret hret a ni a. Kum 1947 a India  a lo Independence khan Assam rama tlang mite awp dan tur duang turin Pu Gopinath Bordoloi kaihhruaina hnuaia Constitution of India duangtu te chuan Sub Committee din a ni a, chumi rawtna ang chuan India Danpui a Sixth schedule hnuaiah Lushai Hill District (a hnuah Mizo District) Autonomous District Council leh Pawi-Lakher Regional Council te hi 1952 khan pek an ni a, hemi hnu lawk hian Assam sorkar chuan “Lushai Hill Chief’s Rights Acquisition Act, 1953” hmangin Mizoram rama Lal lalna chu 1954 khan a ti tawp ta a ni. Lal lalna a atawp dawn tak hian The Lushai Hills District (Constitution of Village Council) Act chu Constitution of India, paragraph 3, Sub.-para (1), Clauses (e) & (f)-in District Council te thuneihna hmangin Village Council a din a. Ni 29. 11. 1953 khan Governor of Assam pawmpuina (assent) lâk a ni a.  Tichuan, Assam Sorkâra Tribal Areas Department-in Notification No. TAD/R/61/52 dated 1^st Dec., 1953 hmangin chu Dân chu a chhuah (published) ta a, chu chu Assam Gazette dated 9^th Dec., 1953-ah chhuah a ni. Tichuan, Mizoram-a kan Village Council neih te chu Sixth Schedule hnuaia District Council leh Regional Council thuneihna hmanga 1953 atanga din anih tak ber chu.

Q : A lova rei tawh si ve. Anih leh, District Council kan neih tawh loh hnu hian Village Council te chu a la ding ta reng si a. Enge a chhan ni ang ?

A3 : Kum 1972-a Mizo District Council tihtâwp a lo nih khân The Dissolution of Mizo District Council (Miscellaneous Provisions) Order, 1972 hmangin District Council Dân siam eng emaw zât chu Union Territory sorkâra hman zui tûra tih (adapted) a ni a, chûng zîngah chuan he Village Council Dân hi a tel ve a.  Thu thenkhat thlâk tûl - 'District Council’ tih leh ‘Executive Committee’ tih aiah 'Administrator’ tih zâwk tûr tih angte chu siam rem a ni.  Kum 1987-ah State puitlinga Mizoram hlân kai a lo nih khân, The State of Mizoram Adaptations of LAWS Order (No. 2) of 1987 chuan State Sorkâr hnuaia hman zawm tûrin a lo ‘adapt’ leh ta zêl a. Tichuan, kum 1953 daih tawha District Council Dân siam chu vawiin thleng hian kan la hmang ta zêl a, a tûl ang zêlin Dân Amendment pawh sorkâr-in a siam ta zêl a ni.

Q : Chuti chu, khawtinah V/C Member inzat theuh kan ni tihna nge ?

A4 :  Ni lov, tuna kan Village Council Dan kan hman mek hi kum 2014 kha Amendment hnuhnung ber kan neih chu a ni rih mai a. Hemi ang hian han sawi dawn ila : Member zât neih theih zat turah hian

(i) In 200 khumlo khaw tan member 3 = Mipa 2 leh Hmeichhe 1

(ii) In 201 - 500 chin tan member 5 = Mipa 4 leh hmeichhe 1

(iii) In 501 - 1000 chin tan member 7 = Mipa 5 leh Hmeichhe 2

(iv) In 1000 chunglam tân Member 9 = Mipa 6 leh Hmeichhe 3

 

Q : Anih leh hei inthlang ram kan ni a, Ruling leh Opposition tih hi a ri fo mai a. V/C ah hian chutiang chu a awm ve thin reng em ?

A5 : Awm tih leh awmlo tiin kan inchhang thei ang chu. Awm ti zawngin han sawi ta ila, Member thlan chhuah te hi Party affiliation nei atanga chuh an ni fova. A tling party tam ber chu VCP nihna dinhmun hi an chang a, VCP ber State a Ruling party an nih chuan Ruling VC an inti deuhva, VCP anih loh chuan Opposition VC an inti deuhva. A dan lamah thung chuan Section 7 ah hian Executive body chungchang a sawi a. Chutah chuan, President, Vice President, Secretary leh Treasurer kha Executive body an ni mai a. Member 3 awmna chinah chuan an zavai hian Executive body ah chanvo an chelh kim vek a ngai hrim hrim a. Sawi dan thenkhat ah chuan Opposition an awm lo ti pawhin a sawi theih bawk ang chu.

 

Q : Anih leh V/C term hi kum engzat nge ? Member zingah term laklawha bang awm ta se engtia tih tur nge ?

A6 : A tir lam hun engemaw ti chhung kha chu kum 3 term a ni thin a, tunah hian kum 5 term a ni. Term laklawhah engemaw vangin V/C member bang a awm chuan Section 6 angin midang thlan leh tur a ni a, State Election Commission in inthlanna a buatsaih ang.

Q : Anih leh VC member atana thlan tawh ban theihna dan a awm em ?

A7 : Awm tehreng mai. Mahni kut ziak ngeia banna a ziah chuan a duh anga ban theih a ni a; tin, Executive body hi hna zo lo leh hlemhle an nih chuan sorkarin enfiahin, a loo dik chuan ban theih an ni a. Member zinga a zawna vawi 3 Meeting a kal lo lui an awm chuan mahni inban an ni bawk a ni.

 

Q : A tawp Berna atan, han sawi belh duh I neih te min han hrilh la a tha ang a ?

A8 : Ka lawm e. Village Council hi mipui te rorelna (Democracy) rama Tualchhung rorelna (Local Government) lungphum pawimawh tak a ni a.  Democracy darthlalang an ni a; chuvangin, Village Council hi Ram inrelbawlna pawimawh leh hlu tak mai a nih avang hian Village Council te hian Ram leh hnam zahawmna tung ding turin dikna leh rinawmna nena hna an thawh a pawimawh em em a ni.

A tirah Village Council te hi Lal aiawhtu, Lal thlaktu atana tualchhung rorel khawl atan liau liauva din a ni a, tualchhunga Dan leh Thupek engemaw chen kengkawh tura tih a ni. Tualchhung hmasawnna (Development) lam khawih tura din a ni lem lo. Amaherawh chu, V.C Dan siamthat 2014 ah erawh chi chuan hmasawnna khawih tura tihna a lo lang ta a. Section “8A”-ah hian an tih tur kimchang taka tarlan a lo ni ta a. Chubakah section 3-naah hian Hmeichhe tana Seat hauhsakna pawh tarlan a lo ni ta a, India Danpui-a 73^rd Constitutional Amendment (Panchayati Raij) zulzui deuhva thuneihna pek an lo ni ta a ni. Sorkarin an thuneihna ching pawh a tilian chho zel a. Mawhphurhna pawh a pe lian chho tulh tulh a. An pawimawhna hi an hriat a, thahnem ngai taka khawtlang tan an tha leh zung, an theihna te an hman tangkai zel hi a pawimawh tak zet a ni.

                     Ka lawm e.