Humour

Mizoram-ah kumin Republic day danglamna em em chu Saiha-ah D.C in a nupui Salute a dawng a, Kolasib-ah D.C in a pasal Salute a dawng thung

SI LOVA THUPEK

Tawng tlem rawh,

Chuti lo chu tawng chhuah tam avangin

Mi huatthu i sawi palh thei.

                                    -Tawngkam i thiam si lova…

I tawng chhun hian,

Tawng ring vak thin suh

Chutilochu mi phunglung an ti ang che.

                                    -Mi nuihzata awm i duh si lova…

Tum vuau suh la

Hlim reng rawh

Chutilochu miin biak har leh intiveiah an ngai ang che

                                    -I hmel a tha si lova…

A hun lovah zai vak vak suh.

Chutilochu mi ang lo emaw an ti ang che.

                                    -I zai thiam si lova…

Ngaihzawng bik nei reng reng suh,

Chutilochu I lakah midang an tim vek ang e

                                    -Mi to tak i ni si lova…

Leng leng suh

Chutilochu lehkha zir hun I nei thei loving

                                    -Lehkha thiam thei i nisi lova…

I theih tawkin vantlang tan inhlan rawh

Chutilochu tanpui I ngaih ve hunah miin an hre lo pal hang che.

                                    -Mi lar i ni rih si lova…

Inkhawm ve thin rawh

Chutilochu rawngbawltuten an ngaisang lo palh ang che.

                                    -Kawppui nei tawh i ni si lova…

Hnathawk vak vak rawh,

Chutilochu I rethei bik palh ang e.

-       I hausa si lova…

Puar takin thil ei vak suh

Chutilochu I pumin a zo lo palh ang e.

                                    -I pumpui a tha si lova…

Tumah ngaihsan nei bik suh

Chutilochu mahni inrintawkna I nei lo palh ang e

                                    -Mahni inrintawkna nei mi i ni si lova…

                      

                         …………….

K.T. Pakhuangte

27.09.1998

HMANGAIH LEH HMANGAIH INTAWNG

 
 

“….Chun leh zua hrang mahsela..

Hmangaih leh hmangaih chu kan lo intawng ta……”

He Thangkura hla hi ka ngaihtuah chhuah apiang chuan ropui ka tih zia han tihlan ka chak a zual phah thin. He hla thu tlar khat lek hian leihringnun a hmangaihna kawng kan zawh hi a phawk chhuak famkim a, a puang chhuak faikel a ni.

A thawnthuah chuan, Zohawpi leh Thangkuran hmangaihna thuthlung an zawm dawna a vai ‘Film’ taka an inchhaina hla a ni a. He hla hi Thangkura Part-8 ah khan a awm a, fiamthu mai a ang na a,  ngaihtuah chet a dawl a, pa thluakah a cham reng tlat a ni.

He khawvela nupa kawpchawi kan remna turah hian hmangaih leh hmangaih intawn hi a har fu a. Hmangaih leh hmangaih intawn chu a nuam a, a hlimawm a, a ropui bawk a ni. Mi va hmangaih viau ila, kha kan hmangaih a khan min lo hmangaih veta si lo sela chu chu he khawvela hringnunah hian thil hreawm tam kan tawng a lo ni reng mai dawn a ni.

Vawikhat chu ka rawlthar chhuah ve awr chauh tih hian khawvel pianken zinga keipawhin a paltlang ve ngai ngei ngei chu ka chungah a rawn lang ta a. Khawvel dana nulat tlangval kawnga ‘Ngaih' han nei veta chu mi alaia la na ve pawl lo nih tawh nak alaiin, kha ka ngaih (Hmangaih..) khan a tira min duh ve em em a ka in hriat khan min lo duh tak tak lo chu lo ni awm tak  a ni. A chunga rinna ka nghah ang hu chuan min ti ve lo tawp mai hi a lo ni a. Kei chuan ka hmangaih tawh laklawh si. Ka hmangaihna ka la let thei tawh silo. Ngaihzawng (Hmangaih) neih vawikhatna a ni bawk a ka la na ta hle mai a, tu khaw hriatpui loh hian ka lo zawi leh nguai mai chu a ni. Mahni leh mahni intihhlum hial duhna te ka rawn nei chho ta a; mahse chutihlai chuan ‘harhna’ ropui tak ka chungah a rawn thleng ta a. Hmeichhe pakhat avanga tisa hreawm, rilru hreawm pu tur ka nih loh zia in hmuchhuak a, mahni intihhlum chu lei taksa boral tawh hnuah pawh van taksa boral leh tura tih kan lo ni si… Chutih avang chuan damlai hreawm a thihhnu hreawm tawrh bawk chu ka ngam tangang lova. Enge ni na vei tiin nulat tlangvalna kawnga hmangaihna chu hawisan ka tum ta ni a, mahse chutia hawisan ka tum lai tak chuan thlemna hi a rawn thleng leh ta a ni, chu thlemna chu hmeichhe pakhat atangin a ni a rawn kal. Ani chuan min hmangaih thu mi rawn hrilh ve leh ta dawt mai. A hma a min duh lo nu kha hmeichhia bawk a nia, tuna min duh thu rawn sawitu hi hmeichhia bawk a ni lo ngai em ni?? tiin mahni leh mahni inzawtin ka in ngaihtuah ta a. Chu nu chu ka hmangaih (Duh ve) thu engmah pawh ka hrilh ve leh ta chuang lova, a tawpah chuan ka lakah a beidawng ta deuh ni hmiang ka ti mai a, a rawn tinawn leh ta lova.

Ni, hmangaihna hi enge ni? Hmangaihna chu thu a ni a, a taka chantir thei mi Hmangaihna chu mihringin kan phuahchawp a ni a, kan chang si. Hmangaihna chu engmah lo atang a din a tak nei a ni si a. A…. ka hrilhfiah thiam pha lo.

Hmangaihna chu engkim a ringa, engkim a beisei a, engkim a tuar chhuak thin…

Chuti si, engatinge hmeichhe pakhat ka hmangaih a, a nin min duh silo. Hmeichhe pakhatin min hmangaih a, keiin ka duh silo.

“Min duhtu ka duh si lo,

Ka duhi’n min duh si lo..” tih hla ang mai lah zuk ni a.

Ni, hmangaihna hi a ropui a, a hlu a, hmangaih leh hmangaih intawng chu khawvela thil ropui ber a ni. A nuam a, a ropui a, a hlu a, a thlum bawk a ni. Chuvangin kan duh a kan hmangaih a te hi neih zel tur a ni. Chuvangin kan nun kal zelah hian min duhtu an awm chuan duh a, hmangaih hi mitin kan tihtheih atan a tha a ni. Min hmangaih lo pui inhmangaih tir tuma phet phet ai chuan a dang min duhtu, min hmangaihtu an la awm tho a ni tih hria ila, mi pakhat chauhah inhambuai suh ang u. Kan hmangaih nu/pa in min lo hmangaih ve lo a nih chuan lak nat vak tur a ni lo. A dang an la tam. Keini anga ngaihzawng tur hmu zo lo hi khawvelah 80% lai an awm tih hria ila, mi ngaihzawng nei laia I hriatte pawh khan a kawppui kha a duh tak tak lo mai thei a; chuvangin han try ve chhin la a lo duh zawk mial mai thei che a sin…. Engmah hi Care vak tur a ni lo. Amaherawhchu mi inhmangaih ngawih ngawih ti thentu i ni ange tih kha hlau la, bihchiang hmasa rawh. Khawvelah hian kan duh berte hi neih tur a nia, Tin, min duh ber tute hi neih bawk tur a ni. Kan duh ber (duh tak) kan neih theihna tur a nih dawn phawt chuan engang hreawm pawh tawrh huam mai tur a ni. Engang hmanrua pawh hman mai tur a ni. Ama’rawhchu mahni hma kan sial lua ange. Kan neih turten min duh ve si loh chuan thu va uk a ni a. Kan dam chhungin kan hlim ngai lovang. Hmangaih leh hmangaih intawng ila, a par chu kan faten seng se, thenawm leh khawtlang tan malsawmna ni ngei turin duh leh duh intawng chu tlangrelthang dawnlo hian i han fawr dun dawn teh ang.

--------------------------------

Ktpakhuangte08071994

KHAWNGLUNG ZINKAWNG

KHAWNGLUNG RAM, AIZAWL-LUNGLEI VIA SERCHHIP ATANGIN

Khawnglung Wildlife Sanctuary-a zin tur hian Aizawl-Lunglei kawng, Bungtlang ‘S’ leh Rawpui khua inkarah, Aizawl atanga 140 Km vela hla ah kawng peng a awm a. Khawnglung peng takah hian Sanctuary Duty Post a awm; heta tanga luh theih hi a ni. Kawngpui atang hian Jeepable Road (2001-02 a laih tawh) 5 Km zet chhuk zawng hlira kal hnuah Ramrikawn a thlen theih  a, hei hiSanctuary ramri a intanna a ni. Ramri atang hian chho zawng hlirin 3 Km vel ke hlira kalin Khawnglung khaw luh dawna kaltlang ngei ngei ngai Lungdai a awm a, Lungdai atang hian Khawnglung khawhlui chu a intan titih der a ni. Lungdai atanga Khawnglung khaw hmunhlui, Khawnglung run laia a khaw awmna chu 5 Km zeta hla a ni ang. Tlangdung kawng a niin, kawng zal leh zau nuam tak, thelh hun mai a ni. Ngaw hnuai kawng tih takah, a dai ruih mai a, chhun nisat vanglai pawhin kalkawng hi a hlim reng mai a ni.

Tuikhur bul, Chala te kawt

Khawnglung hi Kham chhawrdawh pathum zet, sang tak takin a hualchhuak a. Khaw luhna tur hian khan pakhat chauh a awm a, chu chu Lungdai kan tih hi a ni. Heta tang lo hi chuan kham hrui hmanga luh emaw, Leihlawn sei tawk, 100 ft. zeta a sei dawh anih ngawt loh chuan luh theih a ni lo. Kham chhawrdawh pathuamte inkar hi ram zau tak, Lo atan pawh neih thama zau hlir awmna a ni a. Kham chhawrdawh hmasa ber, chuahchhawng lam hi chu Tuichang lui bul lawkah a intan a, chuta tang chuan ram zau leh phar nuam tha tak, Lo fing, tin thum hmun vel zeta zau tur hi a awm a. Chumi chhak lam chu Kham chhawrdawh pahnihna a ni. Kham pahnihna atanga Kham Pathumna inkar pawh hi ram zau tha tak, lo atana neih tham bawka ram pharh hlai a ni. Kham pathumna chung atanga hian Khawnglung khua chu a intan a, Kham zawng zawng hi a sang em em hlawm vek a, 100 ft. aia sang te a ni hawlh hlawm mai. Khamchung, khua atana an hman pawh hi Tin 60 vel zeta zau ram a la awm tho a ni. A ram hi a tha a, ngaw a thain, thing lian tak tak, ‘Chhura rual’ tih mai tur hi a la tam a ni. Ramsa a tam a, Sanctuary huamchhung hi 35 Sq. Km. zeta zau a ni. Sanctuary chhungah hian Ramsial, Sele, Sakei, Sazuk te pawh a la awmin an sawi a, Zawng leh Ngau phei chu 40 rual rual hi an tla sup sup mai a, Khamah, hruia uaithlak peih chuan hengte hi awlsam taka hmuh mai theih ani  hlawm.

 

Thanghniangi te in kawmthang

Khawnglung run hi Lungphun pakhata an ziah dan chuan 1859 kum a thilthleng nia ziah a ni a, Vuttaian Thlanrawn Pawi ho puna, Lalthuama khua hi a run nia sawi a ni. He lungphun hnung lamah hian “HRIATRENGNA - CHALKUNGA LEH THANGHNIANGI NULA LEH TLANGVAL IN HMANGAIH TAK ANNI. KHAWNGLUNG RUNAH THANGHNIANGI HI SALAN HRUAI VE A NI. CHALAN CHHANCHHUAH TUMIN NASA TAKIN A BEI A MAHSE THANGI TIAU LUIAH A TLA PALH TA A NI – Y.M.A” tih  ziah a ni.

 

Khawnglung hmunah ngei chaw ei chu tui duh tak a ni

Khawnglung run anih lai hian in 300 zetah an inchhal a, a runtute hi Arleisang atanga Phulrua tlawn thum zet hawlhzawm atanga Leihlawn siam, a khuaa miten Fehkawng atana an hman thin, tlai tin, Feh haw hnuhnung ber ruala an pheh ziah chu hemi tlai kher hian an pheh theihnghilh atanga leh Lungdaia Duty-te mutthluk lai changa Run niin an sawi. An run dawn lai vel hian Khawnglung khua hian Damlo mempui ngai, nazet mai an nei a, a khuaa nula leh tlangval te hi an mengrim deuh va, ral veng an inthlahdah deuh a ni ang. An run zan pawh hian Zawlbuka riak tlangval ho chu an mutui hle a, thawm engmah hre lovin, zing vartianah a runtute hian a tho hmasa apiang an kap thal hmak hmak mai a ni.

 

Lungdai (Gate awmna hmun)

Khawnglung run thawnthu tingaihnawmtute zinga pakhat chu Chala leh Thangi inhmangaihna thawnthuin a zui hi a ni a. An run zan hian  Chala hi Damlo menpuiin a tlaivar a, chuvangin a thi ve lo. Thangi erawh chu a runtute hian Salah an hruai a, a nu leh pate erawh an hruai tel ve lo. Thangi hi Mualkil Upa fanu a ni a, Zawlbuk chhak lawk, Lal in bulah an khawsa nghe nghe a, Chala erawh hi chu Hmeithai fa a niin, Feh kawng, Tuikhur bulah an khawsa thung. Ngaizawng ru viau mahse, Thangi te hi mi tha fa annih vangin, Hnamchawm tlangval, Chala tan hian han cho en chi a ni lo. Mahse, Thangi zawk hian Chala Sava, Bawngpa a perkthlak,  a kawrawm chhunga a dah tlat a, Chala hnena laktir tuma a awm a pho ngat ngam atang khan an inkarah hmangaihna tuipui chu a lo so liam ta a ni ! Mak tak mai chu, Khawnglung run zan khan Chala khan Hmeichhe naupang pakhat chu a chhanchhuak hlauh mai a. Khatia kum 5 zet Thangi zawnga tuna Burma ram lama an thangbo hnua Thangi a han ruk chhuah hnuaa Tiau luia Thangi tlak tak hnu khan, a beidawng rawn haw kha hun engemaw chen an leng leh renrawn a. Chutah a chhanchhuah nu kha a lo nula ve tawh a, hmeltha tak mai a ni lehnghal a, Chala nen hian an innei ta nghe nghe a. Fanua maltluan chawiin, an thlahte pawh Thiltlang leh Bungtlang ‘S’ velah hian an la cheng hlawm nghe nghe niin an sawi. Helai thawnthu hi chu Lehkhabu dangah chhiar tur tam tak a awm a, sawi zui tawh lo mai ang.

Khawnglung run a nih hnu hian a khua hi engemaw chen ruahsan a ni a, chumi hnuah a khaw hmunhlui atanga 1 km. velah khaw thar an din leh a, 1967 karkhawm khan Bungtlang’S’-ah karkhawm an ni ta vek a. 1976 vel bawr khan Khawnglung ram hi Lovah an nei hlawm a, chutah chuan “Bungtlang lama Buh thiar a buaithlak” tiin Khawnglung hmunah in 30 vel bawr chuan khua an din leh a, ram thang zelah, awm rei hleithei lovin, 1983 khan he Khawnglung khua hi an chhuahsan ta vek nge nghe a ni. Chuta tang chuan Sanctuary hmun atan hian 1990 bawr atang khan Environment & Forest Department chuan a cheibawl tan ta a ni.
-    K.T. Pakhuangte
15072004

Breaking NEWS

Zemabawk Pitchers: Khaled Memorial (II nd Div) Tourney neih mekah Zemabawk Pitchers chuan Semi final an lut ta. Dec 22, Wed hian Kulikawn nen Durtlang Field-ah Semifinal an khel dawn..an chak chuan I Div an kai ang. Pitchers ho hi Pu Rinawma, MLA chuan MLA Fund Rs 10000 (CAM President Cup a an chet that pualin) a pe a, Pu Thianga, VCP-in Bat a leisak tawh bawk. Nl. Manunpuii (MN Enterprise) chuan Jersey mawi tak a leisak a, Cement Company (c/o Avana) chuan Team T-Shirt mawi tak an leisak bawk, anni hian Sponsor an tum bawk a ni awm e.


Reported by aduha from Zemabawk

Dec ni 18, Inrinni khan ZHS Class X 2000 Batch ten ZGHSS-ah Re-union an nei a, Sir Vana leh Pu Zalawra ten an hmanpui.

Reported by aduha from Zemabawk

Nizan (21.12.2010) zan khan Kolasib atanga Misual.com-a lut thin ho chuan Charity Bawm an hun hawnna an nei a, Rs. 11,210/- lai mai a tla a. He sum hi Kolasib khawchhunga Home awm, Davida Team leh TNT-ah pek an tum a niawm e.

Reported by ktpakhuangte from Kolasib

ZEMABAWK FB GROUP

Facebook-ah hian Zemabawk mi leh sa te, inbe thin turin Group siam a ni a. Ni 13.12.2010 atanga siam tan chhuah mah nise, tlawhtu leh hmangtu kan thahnem chak hle. Ni 3 chhungin mi 26 zet member kan tling 26 lai kan tling hman a. Zemabawk atanga FB thin zawng zawng khan, Zemabawk Group hi hmang tangkai theuh ila, kan thian dangte pawh i add zung zung ang u.

Tin, he Blog hi hman tangkai ni bawk se.

IWMP TRAINING HRIATTIRNA

Date 14 - 16, December 2010 hian Agriculture Conference Hall, Aizawl ah Planning and Implementation of IWMP training neih tur a ni a. Hetah hian Phullen, Darlawn, Aibawk leh Thingsulthliah PIA ten Nomination, mi 5 theuh beisei a ni. Dar 9:00 AM (Dt. 14.12.2010)-ah a hmunah kal vek tur a ni.

A telte hnenah TA/DA pek an ni ang.

TRAINING COURSE ON PREPARATION OF DPR A TEL TE THLALAK

PAKHUANGTE: FIAMTHU PAHNIH

PAKHUANGTE: FIAMTHU PAHNIH

FIAMTHU PAHNIH

U Biaka thil min hrilh ka hre chhuak zawk mai. A tia lawm. Kan tlangval lai te kha chuan tun ang hian thutthleng awm hek lo. Mitthi an han awm a, Phulraw chhuat nawhtlian halh mai hnuaiah khan chhuatah Nula nen kan han thuhova, nula kha kan kapkalak ngei a. Tunlai angin eng awm tha hek lo, Tapchhaka Mau alh kha a ni mai a. Bialnute hnungah, Buthupuan ngei kan han bat a. Buthupuan hnuaiah zai pahin hmaa Nula hnute kan han khawih them them mai chu…. Kan bialnute chu an zai sual ul ul mai alawm a ti.

Thianpa Pasena pawhin a tia lawm. "Nula kan rim a, kan nula rim chu a changkang vel lutuk a, a inleng dangte nen chuan thil hming eng engemaw, kan hriat ngai loh a sawi a sawi a. Kan zawm ve thei si lo. Kan ning lutukin, zahmawh kan han sawikhum tak tak mai chu an nui nasa ve tho" zuk ti a..

IWMP TRAINING NEI

Dated Lunglei, the 24^th November 2010

Vawiin chawhma dar 11:00 AM atang khan ni thum chhung awh tur “District level training course on Integrated Watershed Management Programme” BDO’s Conference Hall, Lunglei-ah neih a ni. He Training hi Pu C. Lalduhawma, Addl. D.C, Lunglei chuan hawngin, “Hun rei tak atangin IWDP hi kalpui a lo ni tawh a, training pawh an neih kan hre ngai lova, Watershed Development Programme thar, IWMP-ah hi chuan training ngaih pawimawh hmasak anih hi a lawmawm hle a ni… Central atangin pawisa tam tak min rawn pe a, training tha a awm loh avangin a hmangtuten kan hmang thiam lova, hmun thenkhatah chuan Pawisa avangin intualvuak tak an nap thin a ni” a ti a. “Training hi a tha a, a hlawkthlak hle a ni” a ti.

Hetiang training hi SIRD/ETC ten pe zel thei se a duhthu a sawi bawk.

He huna thusawitu dang, Pu Lalhmangchhuana, BDO chuan, “IWMP hi amah maia kal tur a ni lova, sorkar scheme dang te nena inhnerem taka thawh hi a tum a ni” a ti. An Project enkawl huamchhungah chuan Afforestation lam uar an tum thu a sawi.

Hawnna inkhawm hi Pu Khawlsiamthanga Khawlhring, Principal, ETC Pukpui chuan a kaihhruai a. Lunglei – I & II project huamchhuanga WDT, Watershed Committee, V.C leh NGO aiawh mi 30 tel tura beisei-ah mi 31 an kal a ni.

Ni thum chhung hian Pu Khawlsiamthanga Khawlhring, Principal, ETC, Pukpui; Pu Khuangthansanga Pakhuangte, Asst. Director, SIRD; Pu Lalhmingmawia, Instructor, ETC, Pukpui; Pu C. Zairemthanga, Sr. Lecturer, Lunglei Govt. College leh Pu R. Lalrochama, Sr. Lecturer, Lunglei Govt. College ten zirtirna an pe dawn a ni.

Y.M.A HRUAITU LEH KA MUMANG

October Ni 13, 2005 zan khan mumang mak tak mai ka nei a. ‘Mumang mak’ tih tawngkam ka’n chhakchhuak duhna chhan chu, mithenkhat tan phei chuan a mak hran lovang. Mahse, ka tan chuan a mak em a tin a ni !

Y.M.A a Section hruaitu nih chak, a chak ang ngeia kan thlan thar pakhatte kawmthlanga in pakhat chu a min chiam mai a. Lei min chuan vantlang kalkawng pawimawh tak, vengchhung inkalpawhna hmun hi a huam tel bawk a. Chutia kalkawng ber kan neih loh takah chuan kan Section hruaitute ram paltlang a kalkawng thar reh mai a lo ngai ta a. Kan hruaitupa ram tantlang chuan vantlang kawng pawimawh tak mai chu sial thar kan han tum a, kan hruaitupa chuan a lo phal ta ikhaw lo mai a. Mak kan ti tlang viau a ni. Kan ngaihdan mawlteah chuan, chutiang harsatna thleng tawhah chuan aman tha a thawh hmasa ber anga, a remruatna hnuaiah, a ram chhung ngeiah chuan Vantlang kawng tha tak min sialpui zawk turah kan ngai hlawm a ni.

Hei hian a tarlan chian tak em em a ka ngaih chu, mahni inphat ngam si lova, mite tana malsawmna thlen tum Hruaitu mitdel kan lo thahnem ta em em mai hi a ni.

Kumin hian Chhiahtlangah Mizo ten kan chhuan em em, “I va tlawmngai ve” tih aia “I va Y.M.A ve” tih kan hman phahna hial tawhin “Khawmpui lian” kan hmang dawn a, chutah chuan Hruaitu thar duhawm tak tak kan thlang chhuak leh ngei dawn a ni (He thuziak chhuah a nih meuh chuan hruaitu thar hmel kan hmu tawh mai thei.) Ka hruaitute zingah mahni inphat ngam silova midangte tana malsawmna thlen tum phet kan nei ang tih a hlauhawm hle a ni.

Ka (kan !) ngaihdan mawlte-ah chuan, Y.M.A hruaitu atana qualification chu thil sang a ni lo. 1) Mizo a ni tur a ni. 2) Chhiat tawk an awmin a phusa ber leh midangte tih tur hrelo tih tur a kawhhmuh tur a ni - Thingpui a sem ang a, No a sil ang, thutthleng a pukhawm ang a, P.A system a vuah ang a, zualko a kal ang a, a tlaivar ang a, thlan a lai ngei bawk ang. 3) Tanpui ngai dang an awmin a tanpui ang a, 4) Y.M.A-a a chanvo chelh avanga a mimal leh an chhungkuain hlawkna an tel dawn anih phawt chuan a hnawl ngei ngei tur a ni. A hnawl ngam lo a nih chuan, a hnawl ngamloh ni la la atangin a bang nghal hmaks tur a ni. Chu chu thil harsa a ni lo ?1? Chutiang thil chu harsa a tih phawt chuan hruaitu ni tlak a ni lo.

Y.M.A hruaitu nih vanga engemawni nikhua a Mouthpiece vuan nghal chawt mi hi ka (kan!) duh lova, a tulnain a urthluk ngang avang erawh chuan a vuan chawt hreh tur a ni lo.

Ka daihriatna atanga ka thilhmuh chiang tak mai pahnih, Champhai Gen. Conference (1999) leh Kawnpui Conference (2001)-a Hruaitu thar kan thlang boruak kha a ni. Khatah khan Hruaitu atana duh deuh mai kan nei ve a. A tling lo chiang em em bawk. Amah chu Branch Y.M.A lama kan naupan tet lai atanga kan hmelhhriat tawh a ni a, Branch lamah kum 20 thuartham min talpui tawh a, Central Y.M.A lamah nise, kum 10 dawn a tal ve tawh bawk a, amah ang mihring kha Central Y.M.A hian a mamawh ni ve tlat khan kan hria a, theih tawpin kan tang a; mahse a tling zo lo. A chhan chu hote mawle, midang hnenah a chanchin reng kan lo sawi ngam lova, chu mai a la ni lo, amah khan zahthlak a ti a, midang hnena han zawrh nih kha zuk duh tlat lova!

Champhai Conference-a kan hruaitu inthlang boruak kha R.O ber, Pu B. Daniela khan kaihruai thiam lo phei se’ng chuan a hahthlak ngawt chuan ka ring. Inthlan zawh zana Aizawl lam pana haw te kha kan awm a, zahthlak haih haih tak a ni. Chu ai maha zahthlak ka tih zawk chu a tlinga pakhat hmel kan hmuh, nuam ti lutuk kha a ni! Y.M.A hruaitu thlan thar hmel hlim tak pu ka vawikhat hmuhna a ni.

Kawnpui Conference-ah phei kha chuan kha ai khan a lo rapthlak tawh zawk a. Mimir lamin engmah kan hriat lem loh lai khan, kan thlen inah chuan Chini 20kg. hi mi pakhat hian a rawn dah a, kan thleninte 407 truck khan inthlan dawn zing khan kan Group hruaitu pahnih te khan hla vaklo a mi, ‘Palai’ turin zuk phur chho va! Mak thei ngei! Tlaiah a lawm nan “Ui ngat” zuk talh a! Kan Y.M.A Hruaitu inthlan dan thin kan hriat dan nen khan inperhsan heehaw tak a ni.

Ka (kan !) ngaihdan hi a mawl khawp a, Y.M.A chu a zawhawm ang a (a hlauhawm ngai lovang), a thianghlim ang a, engtiklai pawhin midang tanpui a inhuam reng tur a ni. Chung thil hote vawng nung reng peih mi chu Hruaitu a ni ang. Kei (keini !) chuan ram tana tha lo tur chu a veng theitu kan hrilh ang a, a titu tur dik takin an ti ang. Sorkar kut ke pawimawh tak kan nilovang a, sorkarin tul a tih a, min hmang duh anih chuan ngaihtuahna fim tak hmangin, kan thiltum nena inhmehna chin atanga thuai chhumin kan puih thin ang. Mahni kutzal atanga thuneihna lekkawh hi khua leh tui tha nihphung tur pawh niin alang lo.

Engpawh nise, hun kal tawh, siamthat theih tawh lo hi sawi sawi tlak pawh a ni tawh lo. Hun lo kal tur atan hian hian, ngaihtuahna kan hman a hun ta ! ‘Tunhma ang khan Y.M.A te hi i kal ang u’ ka (kan !) ti reng reng lova. Mahse, Y.M.A thiltum leh dinchhan kan thlak tawh a nih si loh chuan, kan inenlet a hun ta tak zet mai. Section hruaitu atanga bul tanin, Branch Y.M.A, Joint Y.M.A, Group Y.M.A leh Central Y.M.A thleng hian, thenkhat hi chuan kan nihna hi kan hai deuh ta niin a lang. Hawh teh u, hmuh awla a la awm lai ngei hian i inhmuchhuak leh hlawm teh ang u.  Rorelna ni a liam hma ngei hian!

-          K.T Pakhuangte

Life Member.